Über 2 Stunden Theater, Musik, Filme und Reden zur Abschottungs-Initiative. Viele Menschen haben sich zwei Tage vor der Abstimmung getroffen, um Zeichen Widerstands zu setzten. Auch wenn diese Initiative angenommen wurde – sollten wir nicht die Köpfe hängen lassen, sondern weiter gemeinsam für eine andere Gesellschaft kämpfen. In der Schweiz und über ihre Grenzen hinaus.
Und hier der Text von Jonas Rüegg als Text:
s ding mit oisem mass
mier massvolle
aso
mässiger voll wie mass
aso
weniger s volle wiä s mass betonend
well
s volle isch eim ja scho bitzli gschmuuch
aber s mass
das isch klar
das isch richtig
das isch grad
das isch jetzt grad genau richtig eso nöd zvill und nöd zwenig me muess sich ebe au chöne begnüege mit dem wome häd und nöd immer no meh welle
mier massvolle
mier händ s‘ mass ja eigentlich erfunde
scho de eint
häd mass gnoo dozmal
bevor er de öpfel
aso bevor er dem andere de huet
aso mit sinere armbruscht
de
aso eigentlich rächt
aso eigentlich rächt überleit
aso häd überleit und rächt gha häd er
eigentlich
de
häd aso überleit und befunde dass das nöd das mass der dinge isch was de
aso de ander
aso de fremdi fötzel
aso de hämpchrage gschtiifeti federebuschusepützleti de
also was de eso useglaah häd
und häd aso mass gnoo
häd aso eigentlich ä scho en massgschniiderete plan i de täsche gha
i dere täsche
det
wo au die pfiil
aso die für die woner mass gnoo häd
häd aso i einere wuet
und trotzdem
überleit
aso i einere himmelherrgottsschreiende innere regig
aso eigentlich
rächt überleit
inere mässig massvolle innere regig
aso massiv erregt
aso eigentlich rächt überleit (mit em massgschniiderete plan und dänn mass gnoo) und trotzdem tribe vo dere
eigentlich
aso rächt überleit
rächt
masslose
oder wenigschtens übermässige
ja vilicht sogar echli aamassende
massive erregig
aso de griff nach de armbruscht
und dänn sin sohn
ich mein me hett ja nöd welle gseeh was für es bluetbad das hetti chöne aarichte
aso es massaker
uf dene massächer
wo jede vater sim sohn vo sim vater sim vater und jede sohn vo sim vater a sim sohn sim sohn wiitergää und übernoo
und die wäred dänn bluetrot tränkt
aso massegreber
wänns en nume bitzeli i de nase gjuckt
oder scho nume chli fescht schnuufe langet ja scho und das chönnt me sich ja jetzt scho no vorstelle bi sonere ufregende schtori aber guet ich mein das lömmer jetzt mal
und das isch ebe dänn das womer en draa misst
es isch em ebe am schluss nöd misslunge
isch ebe keis drastischs massedrama
und häd em drum en uumässige ruef iibracht
(wänn au massiv überschetzt aber wie gseit das lömmer jetz mal)
aso de griff nach de
und de schuss mit em
und dänn häd er ebe i dere masslose uswägslosigkeit
woner inetruckt worde n isch
woner sich ja sälber inetruckt
woner sich inemanövriert häd
ebe n am schluss trotzdem rächt massvoll
aso häd sini churzi masslosigkeit
eigentlich rächt überleit
wider gmässiget
und häd sin plan nach mass durezoge
fadegrad
so isches gsii
seit me
das isch richtig
seit me
so isches imfall würkli passiert
seit me
das isch jetzt imfall würkli fadegrad genau richtig eso passiert seit me nöd zvill und nöd zwenig seit me me muess sich ebe au chöne begnüege mit dem wome häd und nöd immer no meh welle seit me
säge mier
mier massvolle
aso mier grad eso uusgmässe umgängliche
aso mier im umgang uusgschproche massvolle
aso mier im umgang mässig masslose
aso mier massgschniideret umgängliche
aso mier imene uusmass masslos das es grad no eso passt
und i das mass passt nöd jede
und das mass passt nöd jedem
das mass wo mier uusgmässe
aso das uusgschproche massvolle
wo mier
aso für ois
das wär aamassend
das wär uusgschproche vermässe
wänn eine
wo das mass nöd passt
aso wo nöd is mass inepasst
wo aso vermessenerwiis siis mass
vilicht sogar sälber vermisst
wo ois oises mass vermessenerwiis
vilicht sogar vermiese wett
wo ois vilicht sogar es anders mass verpasse wett
as das wo mier inepassed
aso mier aamassenderwiis uf sone art ine n anders mass inepasste
aso inetruckte
aso inemanövrierte
da müemer scho
aso da müemier
eigentlich uusgsproche n umgängliche
aso mier im umgang eigentlich sehr apasste
da mümer scho
massgschniidereti massnahme n ergriiffe
aso massiv
mier müend d glägeheit bim schopf ergriife
und das us em schrank hole
wo jede vater sim sohn vo sim vater sim vater und jede sohn vo sim vater a sim sohn sim sohn wiitergää und übernoo häd
pass uf das chönnt ois scho bitzli i dä nase jucke jetzt
bluetrot
aber da dänn scho wider
das isch jetzt grad genau richtig eso nöd zvill und nöd zwenig me muess sich ebe au chöne begnüege mit dem wome häd und nöd immer no meh welle
mier massvolle
aso mier solang ois oises mass passt massvolle
aso mier solang die massgebliche umschtänd käs uusmass anämed massvolle
aso mier solang niemert vermässenerwiis ois es anders mass verpasse
oder aamassenderwiis vilicht sogar sälber i oises mass inepasse wett massvolle
mier solang alles sini ornig häd massvolle
mier solang alles klar isch
solang fadegrad oises mass durezoge wird massvolle
aso mier eigentlich immer grad eso massvolle wie s rächt isch
aso mier eigentlich immer grad eso massvolle wie s ois rächt isch
mier aso rächt überleit
eigentlich immer grad eso dass es no fadegrad i d schnure passt und wänn die schnure nachher blüetet dänn sind sicher nöd mier tschuld massvolle
mier massvolle
aso mier mässig masslose
mier gmässigte
mier massiv mittelmässige aber
wänns hert uf hert chunt
umso massivere
aso unumgänglicherwiis tribe
vonere masslose
oder wenigschtens übermässige
ja vilicht sogar echli aamassende
massive erregig
mier vo de umschtänd tribene
mier vonere himmelherrgottsschreiende innere regig
masslos usschriitende
massiv usteilende
fascht bis zur usartig usufernde
aber ebe immer nume grad sovill wie nötig
mier aso
rächt überleit
nöd umgängliche
mier aso unumgänglich immer wider
das isch jetzt fadegrad i die bluetroti schnure genau richtig eso nöd zvill und nöd zwenig me muess sich ebe au chöne begnüege mit dem wome häd und nöd immer no meh welle vo ois
hett de sin hals halt nöd eso volle gnoo
well oisi müüler oisi volle lömmer ois nöd näh
nöd vo de andere
dene dehärgloffene
dene inegschloffene
dene oisi abschottig umschlüüfende ineschliichende und nachher i n irne massaazüüg umeschliichende massenarbetslose
aso massnahme
muul uf auge zue
aso dene uf s muul und d auge zu
die bindemer ine zue und s muul au
und dänn gits en tscharterfluug
kä masseabfertigung
das
isch
massarbet
(nD) 